Khale ka holobye Tito Mboweni u hundzile emisaveni ari na malembe ya 65

Khale ka holobye wa timali na holobye wa Reserve Bank Tito Mboweni u hundzile emisaveni. Ndyangu wa yena wu humesile xitatimende hi Mugqivela nivusiku wu tivisa ku hundza emisaveni ka yena, tani hi leswi swi vikiweke hi News24. Mboweni a ri na malembe ya 65 hi vukhale.

“Hi gome lerikulu ndyangu wa ka Mboweni wu tivisa ku hundza emisaveni ka khale ka holobye wa Reserve Bank na holobye wa timali Tito Titus Mboweni. Ndyangu wu vavisekile swinene hi ku hundza emisaveni ka holobye Mboweni endzhaku ka ku vabya xinkarhana. U hundzile emisaveni exibedlhele eJoni hi Mugqivela nivusiku a rhendzeriwile hi varhandziwa va yena,” ku hlayeka xitatimende.

Mboweni, loyi a tivekaka hi ku hoxa xandla ka yena lokukulu eka ikhonomi ya tiko, a ri holobye wo sungula wa muntima eka South African Reserve Bank (SARB). U tirhile eka xivandla lexi kuringana khume ra malembe, kusukela hi 1999. Loko anga se sungula ntirho eka Reserve Bank, u tirhile tani hi Holobye wa Vatirhi eka khabinete ya Nelson Mandela kusukela hi 1994 kuya eka 1999.

Hi lembe ra 2018, Mboweni u vuyile eka tipolotiki loko a thoriwa tani hi holobye wa timali hi President Cyril Ramaphosa. U ye emahlweni a tirha eka xivandla lexi ku fikela loko a ya eku wiseni hi Ndzhati 2021.

Ndyangu wa ka Mboweni wu komberile vuhlayiseki bya xihundla eka nkarhi lowu wo tika tani hi leswi va langutaneke na ku lahlekeriwa ka vona.  Va kunguhata ku avelana vuxokoxoko hi xitalo emasikwini lama taka.

GCIS